पावसाची रिपरिप; नदी-नाले कोरडेच! जोरदार पावसाच्या प्रतीक्षेत शेतकऱ्यांचे डोळे आभाळाकडे; जुलै अखेरीसही जलसाठ्यांची चिंता कायम

मानोरा : गुरुवारी दिवसभर पावसाची रिपरिप सुरू असली तरी दमदार पावसाने अद्याप हजेरी लावलेली नाही. त्यामुळे तालुक्यातील नदी-नाले यंदा अद्याप ओसंडून वाहिले नसून जलसाठ्यांवरही त्याचा गंभीर परिणाम दिसून येत आहे. गाई-म्हशींना पिण्यासाठी पुरेसे पाणी उपलब्ध होत नसल्याने गुराख्यांना थेट धरण क्षेत्रात जाऊन जनावरांना पाणी पाजावे लागत आहे.

धरणातील पाणीपातळी दिवसेंदिवस खालावत असून अनेक शेतकऱ्यांनी धरणावर विद्युत मोटारी टाकून सिंचन सुरू केल्याने उपलब्ध पाण्यावर अधिक ताण पडत आहे. एकीकडे पावसाची प्रतीक्षा आणि दुसरीकडे सिंचनासाठी वाढता उपसा यामुळे भविष्यातील पाणीटंचाईचे संकेत आतापासूनच दिसू लागले आहेत.

##:नदी-नाल्यांना अद्याप पूर नाही

दरवर्षी या काळात वाहू लागणारे नदी-नाले यंदा मात्र अद्याप कोरडे आहेत. पावसाच्या जोरदार सरी न पडल्याने नैसर्गिक जलस्रोतांना अपेक्षित पाणी मिळालेले नाही. त्यामुळे शेतीसोबतच पशुधनाच्या पिण्याच्या पाण्याचा प्रश्नही गंभीर बनत चालला आहे.

## विहिरींनी गाठला तळ

ग्रामीण भागातील अनेक विहिरींची पाणीपातळी मोठ्या प्रमाणात खालावली असून काही विहिरींनी अक्षरशः तळ गाठला आहे. त्यामुळे पिण्याच्या पाण्यासह शेती आणि जनावरांच्या पाण्याचा प्रश्न आगामी काळात आणखी बिकट होण्याची शक्यता व्यक्त होत आहे.

## जोरदार पावसाची आस

जुलै महिना संपत आला तरी अपेक्षेप्रमाणे पाऊस न झाल्याने शेतकरी चिंतेत आहेत. पिकांना दमदार पावसाची गरज असताना आकाशात ढग दाटतात, मात्र जोरदार सरी कोसळत नसल्याने शेतकऱ्यांची चिंता वाढली आहे. त्यामुळे आता तरी मुसळधार पाऊस पडू दे अशी आर्त हाक शेतकरी देत आहेत.

## पाणी जपून वापरण्याची गरज

धरणातील उपलब्ध जलसाठा झपाट्याने कमी होत असल्याने सध्या असलेल्या पाण्याचा काटकसरीने वापर करणे गरजेचे झाले आहे. अनियंत्रित पाणी उपसा सुरू राहिल्यास येत्या काळात शेतीबरोबरच पशुधन आणि नागरिकांनाही तीव्र पाणीटंचाईला सामोरे जावे लागू शकते. प्रशासनानेही जलसाठ्यांच्या स्थितीचा आढावा घेऊन भविष्यातील पाणीटंचाईसाठी आतापासूनच उपाययोजना करण्याची गरज आहे.