अमरावती शिक्षक मतदारसंघात पुन्हा रंगणार राजकीय रंगत; ‘पोहरे-भोयर-देशपांडे’ समीकरणाची चर्चा!

२०२०च्या ‘पैठणी पॅटर्न’नंतर शिक्षक मतदारांचा कौल कोणाच्या बाजूने? सरनाईकांच्या दुसऱ्या पसंतीच्या विजयाची पुनरावृत्ती होणार की नवे समीकरण?

वाशिम विशेष प्रतिनिधि : अमरावती विभाग शिक्षक मतदारसंघाच्या निवडणुकीचे पडघम वाजू लागले असून, शिक्षक मतदारांच्या प्रश्नांबरोबरच राजकीय समीकरणांचीही जोरदार चर्चा सुरू झाली आहे. काँग्रेसच्या प्रा. अदिती पोहरे, माजी आमदार प्रा. श्रीकांत देशपांडे, शेखर भोयर यांच्यासह विद्यमान आमदार किरण सरनाईक आणि अन्य उमेदवारांनी अर्ज दाखल केल्याने मतदारसंघातील चित्र बहुरंगी झाले आहे. ३0 उमेदवारांचे अर्ज वैध ठरले होते.त्या पैकी चार उमेदवाराणी  अर्ज मागे घेतल्याने 26 उमेदवार निवडणुकीच्या मैदानात उतरले आहे. अमरावती विभागात अमरावती, अकोला, बुलढाणा, वाशिम आणि यवतमाळ या पाच जिल्ह्यांचा समावेश आहे. २०२०च्या निवडणुकीत सर्वाधिक शिक्षक मतदार अमरावती जिल्ह्यात १०,३८६, त्यानंतर बुलढाणा ७,४८४, यवतमाळ ७,४५९, अकोला ६,४८० आणि वाशिम ३,८१३ होते. एकूण मतदारसंख्या ३५,६२२ होती.

२०२०चा निकाल आजही चर्चे

२०२०ची निवडणूक या मतदारसंघाच्या राजकीय इतिहासातील वेगळी निवडणूक ठरली. पहिल्या पसंतीच्या मतांमध्ये कोणत्याही प्रमुख उमेदवाराला विजयासाठी आवश्यक कोटा पूर्ण करता आला नाही. त्यानंतर पसंतीक्रमाच्या मतमोजणीत किरण सरनाईक विजयी झाले, तर श्रीकांत देशपांडे दुसऱ्या क्रमांकावर राहिले. सरनाईकांना अंतिम निकालात १५,६०६ मते, तर देशपांडे यांना ९,१९१ मते मिळाली.

त्या निवडणुकीत मतदारसंघात पैठणी वाटपाच्या आरोपांमुळेही वातावरण गाजले होते. मात्र, कोणत्याही उमेदवारावरील अशा आरोपांना तथ्य म्हणून नोंदविण्याऐवजी ते त्या काळातील राजकीय आरोप-प्रत्यारोप म्हणूनच पाहणे आवश्यक आहे.

‘शिक्षकांच्या प्रश्नांपेक्षा वैयक्तिक राजकारण?’ मतदारांत चर्चेला उधाण

यावेळी काही शिक्षक मतदारांमध्ये मागील कार्यकाळाच्या कामगिरीवरून चर्चा सुरू असल्याचे चित्र आहे. ‘शिक्षकांच्या प्रलंबित प्रश्नांपेक्षा वैयक्तिक राजकीय समीकरणांना अधिक वेळ देण्यात आला,’ असा आरोप काही मतदारांकडून केला जात असल्याची चर्चा आहे. मात्र, हा आरोप संबंधित उमेदवाराची भूमिका जाणून घेतल्याशिवाय निष्कर्ष म्हणून मांडता येणार नाही.

शिक्षकांच्या वेतनश्रेणी, जुनी पेन्शन, अनुदानाचा प्रश्न, शिक्षक भरती, सेवाशर्ती आणि शिक्षण संस्थांच्या विविध अडचणी यांसारखे मूलभूत प्रश्न पुन्हा एकदा प्रचाराच्या केंद्रस्थानी येण्याची शक्यता आहे.

‘आपल्या जिल्ह्यातील लेक’ म्हणून पोहरे यांच्याकडे लक्ष

काँग्रेसने प्रा. अदिती पोहरे यांना उमेदवारी दिल्याने अमरावती जिल्ह्यातील शिक्षक मतदारांमध्ये वेगळे समीकरण निर्माण झाल्याची चर्चा आहे. ‘आपल्या जिल्ह्यातील लेक’ म्हणून पोहरे यांच्याबद्दल सहानुभूतीचे वातावरण निर्माण होऊ शकते, अशी राजकीय चर्चा आहे. पोहरे यांची पार्श्वभूमी शिक्षण क्षेत्राशी जोडलेली असून, त्या शिवाजी शिक्षण संस्थेचे अध्यक्ष हर्षवर्धन ऊर्फ भैय्यासाहेब देशमुख यांच्या कन्या आहेत.

शिवाजी शिक्षण संस्थेशी संबंधित शिक्षक मतदारांची संख्या या निवडणुकीत महत्त्वाची ठरू शकते, असा दावा विविध वृत्तांत करण्यात आला आहे. मात्र, या मतदारांचा अंतिम कल काय असेल, हे मतदानानंतरच स्पष्ट होणार आहे.

भोयर पुन्हा मैदानात; देशपांडेंसमोर अस्तित्वाची लढाई

शेखर भोयर यांचेही नाव पुन्हा चर्चेत आहे. शिक्षक संघटनांच्या माध्यमातून तयार झालेला त्यांचा संपर्क आणि मागील निवडणुकीतील मतांचा आधार यामुळे ते समीकरणातील महत्त्वाचे नाव ठरत आहेत. दुसरीकडे प्रा. श्रीकांत देशपांडे हे या मतदारसंघाचे माजी आमदार असून, २०२०च्या निवडणुकीत ते दुसऱ्या क्रमांकावर राहिले होते. यावेळी त्यांनी पुन्हा उमेदवारी दाखल केल्याने त्यांची राजकीय पुनरागमनाची लढाई म्हणूनही या निवडणुकीकडे पाहिले जात आहे.

सरनाईकांची ‘दुसऱ्या पसंती’ची बाजी यावेळी किती उपयोगी?

२०२०मध्ये पहिल्या पसंतीच्या मतांमध्ये सरनाईक, देशपांडे आणि भोयर यांच्यात चुरस होती. पुढील पसंतीच्या मतांच्या हस्तांतरणानंतर सरनाईक विजयी झाले. त्यामुळे या वेळीही पसंतीक्रमाची मते निर्णायक ठरणार का? हा प्रश्न शिक्षक मतदारसंघाच्या राजकारणात महत्त्वाचा ठरत आहे.

यावेळी मात्र परिस्थिती २०२०पेक्षा वेगळी आहे. काँग्रेसच्या अदिती पोहरे यांच्यासह किरण सरनाईक, श्रीकांत देशपांडे, शेखर भोयर आणि अन्य उमेदवार मैदानात असल्याने मतांचे विभाजन कसे होते, याकडे राजकीय वर्तुळाचे लक्ष आहे. कोणत्याही उमेदवाराच्या विजयाचा अंदाज बांधण्यापेक्षा पसंतीक्रमाच…